كيف ستبدو الحكومات بعد خمس سنوات من الآن؟
من يومين، دبي أعلنت أنها هتكون أول حكومة تعتمد بالكامل على تقنية البلوكشين من خلال خطة تتضمن التحول بنسبة 100 % إلى تقنية البلوكشين بحلول عام 2020.
دا معناه ايه؟
كل الأوراق والوثائق الحكومية هتتحول للبلوكشين بالتالي مش هيكون في حاجة للمحامين أو الأقسام الحكومية لمراجعة الأوراق والوثائق وتأكيدها.
جوازات السفر هتكون رقمية ومعتمدة على البلوكشين وبالتالي الدخول والخروج من مطار دبي هيكون بشكل أكثر سهولة وبدون أي تعقيدات
هيتم إطلاق نظام معتمد على البلوكشين لتتبع وتسجيل كل العقود العقارية والمعاملات المتعلقة بالممتلكات سواء كانت بيع أو تأجير أو فواتير التليفونات والكهرباء
هيكون في عملة رقمية مشفرة رسمية خاصة بدبي، ودا تم الإعلان عنه بالفعل في شهر أكتوبر الماضي، والعملة اسمها Emcash، وهتتيح لكل مواطنين دبي أنهم يقوموا بكل معاملاتهم المالية من خلال العملة الرقمية دي.
زي ما شرحنا قبل كدا، أحد المبادىء والتطبيقات المهمة للبلوكشين هي فكرة العقود الذكية، ودا دبي بتحاول تعمله من خلال تطبيق فكرة العقود الذكية وتتبع والسماح بكل المعاملات المادية والعقود والاتفاقات من خلال البلوكشين، ودا معناه أن مش هيكون في حاجة لمهنة "الوسيط" أو "السمسار" بمعناه الحالي، يعني على سبيل المثال مش هيكون في حاجة لمهن زي المحامين، المحاسبين، المصرفيين أو العاملين في البنوك، موظفي الهجرة، والموضوع ممكن يوصل أن مفيش حكومة بمعناها الحالي والمفهوم لينا.
تطبيق تقنية البلوكشين هيدفع دبي أنها تضيف أكتر من 100 مليون مستند كل سنة، ودا هيوفر تقريبا 25 مليون ساعة عمل وحوالي 1.5 مليار دولار.
تخيّل المستقبل القريب، أن المواطنين بيقوموا بكل حاجة عن طريق الإنترنت وهما اللي بيأكدوا على معاملات بعض بدون أي تدخل حكومي، ساعتها هيكون المستقبل بحكومات اكثر مرونة و اقل في التكلفة
