ico القيمة الفعلية للمشروع

القيمة الفعلية للمشروع
فى نهاية شهر ديسمبر وأول يناير حصل إرتفاع كبير فى الأسعار وتخلل أثناء الصعود عمليات Pump كبيرة على كل العملات
عمليات الـ Pump اللى حصلت أهملت قوة العملات كلها وساوت بين المشاريع وبعضها ويمكن بالعكس كمان ديه علت مشاريع ترتيبها أقل علي مشاريع ترتيبها أعلي
علشان كده لما حصلت عمليات الـ Dump أكتر مشاريع إتضررت هي المشاريع اللى كان ترتيبها أقل وكانت سابقة مشاريع ترتيبها أعلي

خليني أوضح النقطة اللى فاتت بشكل تاني من خلال النقطتين الجايين
إزاى بنختار المشروع اللى بنستثمر فيه؟
إزاى بيتم تسعير المشروع (يعني نحدد القيمة الفعلية للعملة الواحدة فى المشروع)؟

بنختار المشروع اللى بندخله بناءاً على دراسة المشروع (فكرة المشروع - فريق العمل - الجدول الزمني - ورقة المشروع - النموذج المبدئي Prototype - كمية العملات المتاحة Total supply)
لما بنقتنع بالنقط اللى فاتت ديه بنقرر نستثمر فى المشروع

بعد كده المشروع بياخد إتجاه تاني علشان نقدر نقيم أو نسعر قيمة العملة الحقيقية فى الوقت الحالي من خلال (الجدول الزمني - المنتج Product)
طول ما المشروع ملتزم بالجدول الزمني فقيمة المشروع فى تزايد مستمر
وجود منتج أو إصدار مبدئي ألفا أو بيتا من المنتج بيزود قيمة المشروع
فبالتالي لو المشروع مش ملتزم بالجدول الزمني أو مفيش منتج لسه فقيمة المشروع الحقيقية بتبقي قيمته في الـ ICO ويمكن أقل كمان حسب حالة المشروع

فبالتالي لما حصلت عملية الـ Pump الأسعار كلها إندفعت لأعلي من غير تمييز لحالة المشروع إذا كان المشروع ناجح أو لأ
حتي في حالة المشروع الناجح محصلش أى تمييز لحالة المشروع إذا كانت قيمته تستاهل الإرتفاع ولا لأ
وكانت أكثر العملات اللى شهدت صعود هي العملات اللى الـ Supply ليها قليل و العملات اللى سعرها كان قليل أقل من 5 سنت

فلما حصلت عملية التصحيح فى السوق حصلت عملية Dump كبيرة ولأن ماكنش فيه تمييز بين المشاريع وبعضها فبالتالي هبطت المشاريع لقيمها المستحقة
فلما نلاقي مشروع كان لسه جديد ومفيش أى منتج ظهر ليه ولا حتي فى حالة الألفا فبالتالي لما يهبط سعر المشروع لقرب سعره لما كان فى الـ ICO فده يعتبر شيئ منطقي مش شيئ غريب
الفروق اللى حصلت بين المشاريع وبعضها هي اللي خليت القيم تختلف
فمثلاً المشروع اللى كان ماشي على الجدول الزمني بس لسه ما أصدرش أى منتج كان هبوطه كبير بس موصلش لقيمته في الـ ICO
إنما المشروع اللى ما أصدرش أى منتج وكمان متأخر فى الجدول الزمني فهبوطه كان أكبر ووصل لقيمته فى الـ ICO ويمكن أقل
أما المشاريع اللى كان عندها منتج من البداية وماشية على الجدول الزمني فكان هبوطها أقل من هبوط المشاريع السابقة

الخلاصة:-
- اللى حصل فى السوق كان نوع من أنواع الترتيب للمشاريع حسب القيمة الفعلية لكل مشروع
- الصعود السريع للسوق تخلله عمليات Pump مميزتش بين جودة المشاريع وبعضها وكان حاكمها الأساسي هو السعر القليل Low Unit Price والكمية المعروضة Circulating Supply
- طالما حصلت عملية Pump على عملة ما فمن الضروري بل المؤكد إنه لازم يتبعها عملية Dump لأن الغرض من الـ Pump هو الـ Dump
- سرعة هبوط العملات إختلفت من مشروع للتاني وكان المتحكم الرئيسي فيها هو قيمة العملة الفعلية Real Value of the Unit Price
- قيمة العملة الفعلية بتتحدد عن طريق (مدي الإلتزام بالجدول الزمني - وجود منتج)
- دراسة المشروع نقطة لاغني عنها لأن المشروع القوي بيحد من خسايرك وقت الهبوط وبيخليها مؤقتة لحد مايستكمل صعوده