The solution no even hard like that, but e go require sense and unity. First thing, make we truly forget tribalism. Because as long as we dey divide by tribe, religion, or language, politicians go continue dey use am hold us down. If we fit see ourselves as one people wey just want better life, then nobody fit use “na my brother” or “na my tribe” deceive us again.
Another thing be say, we gats reject those 2k or 5k, plus rice or wrapper, wey dem dey carry come during election time. That small money fit sweet for that moment, but after election, na suffering go remain for four years or even more. If we wise, we go know say selling our vote na like selling our future.
The youths too get big role. Make we stop to allow politicians use us as thugs. Anytime we agree to intimidate voters or cause wahala for election ground, we dey block our own chance for good governance. Instead of being used to disturb voters, make we be the ones to protect our votes, spread the truth, and stand strong for justice.
No be like you cap for here. See eh, the major reason why we no go fit get the kind of ruler wey the people go enjoy nah because of all these factors you mention for your first paragraph. Many citizens dey like put this tribalism for front when them wan vote because them feel say once the favorite enter seat, things go better for them but most times e no dey turn out the way them plan am since that person go mostly do wetin go favor him and him generation.
When people begin to comot this kind of mindset for body, I bet you say them go begin to see things in a different way. As e be, these politicians sef don know say the masses dey divided nah make you go dey see them dey give very beautiful manifestos but zero performance once dem enter.
